Halos 10 taon na si Cath sa mga among taga
Mid-levels, pero tandang tanda pa niya nang dalhin siya ng among babae sa
palengke para maging pamilyar siya sa lugar dahil kasama sa trabaho niya ang
pamimili ng lulutuin araw-araw. Isang araw ay inutusan si Cath ng kanyang amo
na bumili ng paboritong gulay ng kanyang alaga. “Auntie (tawag nito kay Cath),
today you will buy the favorite vegetable of mui mui. You buy the small tree”.
Hindi na naisip tanungin ni Cath kung ano ang talagang gustong pabili ng amo sa
tinuran nitong “small tree” pero sumagot din siya agad ng “Yes, ma’am”.
Pagdating niya sa palengke ay doon lang niya pinag-isipan ng husto kung ano ang
gustong ipabili ng kanyang amo. Naikot niya ang palengke ng tatlong beses
hanggang mamataan niya ang broccoli, at noon lang niya naisip na ito lang ang
gulay na maihahalintulad sa maliit na punong kahoy. Agad niya itong binili at
dali-daling umuwi na. Naabutan pa niya ang among babae sa kusina, na agad na
tiningnan ang kanyang dala-dalang trolley, bago sinabi ang, “Auntie, how much
the small tree? You are smart, auntie”. Napangiti na lang si Cath at pilit na
pinigilan ang halakhak. Sa isip niya, mahirap ang magtrabaho kung hindi sila
nagkakaintindihan ng amo, kaya sa bawat utos nito ay common sense na lang ang
ginagamit niya. Sa paglipas ng panahon ay natuto na ring magsalita ng English
ang kanyang amo, lalo na ang mga tamang salita para sa mga gulay, kaya mas
gumaan na ang kanyang trabaho. Si Cathy ay tubong Ilocos Sur. – Regina de
Andres
