Halos 15 taon na mula nang maghiwalay ng
landas nina Jing at Norie. Naging magkarelasyon sila dito sa Hong Kong at kahit
lihim lang ang kanilang relasyon ay tumagal din ito ng halos isang taon.
Hindi
kasi maamin noon ni Norie na ang kanyang kasintahan ay isang tibo. Dahil dito
ay itinago niya ito sa kanyang mga kaibigan at pamilya sa Pilipinas. Kalaunan
ay naghiwalay din sila at si Jing naman ay umuwi na sa Pilipinas at doon na
naghanapbuhay. Matapos ang maraming taon ay nagkaroon muli ng komunikasyon ang
dalawa sa pamamagitan ng Facebook. Nagsimula sa kumustahan at laging pag-uusap
sa messenger, at halos araw-araw ay nagkakausap din sila sa chat.
Marahil dahil
may nakaraan sila ay nagkaroon ulit ng pagkakataon na sariwain nila ang
kanilang mga nakaraan. Si Jing ay single hanggang ngayon samantalang si Norie
ay nagkaasawa at anak, pero ngayon ay hiwalay na. Unti-unting nabuo ulit ang
kanilang pagtitinginan, ngunit ang problema ni Norie ay hindi niya alam kung
paano niya ipapaliwanag sa kanyang anak ang kanilang relasyon, at kung paano
nito tatanggapin. Hindi siya nangangamba sa kanyang mga magulang at kapatid
dahil alam niyang puwede siyang unawain ng mga ito. Ang payo naman sa kanya ng
kanyang mga kaibigan ay pag-isipan niyang mabuti ang kanyang sitwasyon at
siguraduhing ito nga ang relasyong gusto niya at saka niya ipaliwanag sa
kanyang anak.
Mahirap nga naman na sumubo siya sa isang relasyong hindi rin
naman tiyak ang patutunguhan, lalo na at si Jing ay nasa Pilipinas at si Norie
ay nasa Hong Kong pa rin. Ayon pa sa mga payo ng kanyang kaibigan, mahirap ang
isang long distance relationship o LDR, at kailangang buo ang loob ng
magkarelasyon na panatilihin itong maayos.
Ang pinakaimportante, hindi rin
makasiguro si Norie sa kanyang damdamin dahil baka rin lang daw matagal na
siyang di umiibig kaya’t nahulog muli ang loob niya kay Jing. Si Norie ay isang
dalagang ina na may 14 anyos na binatilyong anak. –Jo Campos