Responsive Ad Slot

Latest

Sponsored

Features

Buhay Pinay

People

Sports

Philippine News

Join us at Facebook!

RICO J. PUNO, 65

31 October 2018

Marami ang nagulat sa biglang pagpanaw ng beteranong singer na si Rico J. Puno (Enrico de Jesus Puno ang tunay na pangalan niya), 65, noong madaling araw ng Oct 30, sa St Luke’s Hospital sa Taguig City. Ayon sa kanyang anak na si Tosca Camille Puno- Ramos, atake sa puso ang ikinamatay ng kanyang ama. Masaya pa raw ito noong nakaraang gabi dahil excited sa kanyang shows at shoot para sa station ID ng ABS CBN. 

Kamakailan lang ay laman ito ng mga balita dahil sa paghahanda niya para sa 40th anniversary concert niya, at ang pagpa-file niya ng kandidatura bilang konsehal ng Makati sa susunod na halalan.

Ang huling presscon na dinaluhan niya ay noong Oct 18, para sa concert na “Sana Tatlo Ang Puso Ko” kasama ang sina Marissa Sanchez at Giselle Sanchez. Namataan din siya noong Oct 21 na kasama ang kanyang anak na si Tosca sa Rockwell Powerplant Mall sa Makati City.

Rico J. Puno
Noong 2015 ay sumailalim ang batikang singer sa open heart surgery, at noong December 2017 ay sumailalim sa angioplasty, at kinabitan bagong pacemaker.

Ilan sa mga awiting pinasikat niya ay ang “ Kapalaran”, “Lupa”, “Macho Gwapito”, “May Bukas Pa”, “The Way We Were”. Isa si Rico sa nagpalaganap, at masugid na promoter ng OPM (Original Pilipino Music), at tuloy-tuloy ang kanyang pag-awit sa mga ibat ibang bahagi ng Pilipinas, at ibang bansa.  May sarili siyang tatak, ang pagkakaroon ng baong “green jokes” sa kanyang sa mga shows, na kinaaliwan ng kanyang manonood.

Hindi lang isang mahusay na singer si Rico dahil siya ay naging TV host, actor-comedian at pulitiko. Naging konsehal siya ng mahabang panahon sa Makati at tumakbo ring vice mayor, pero natalo siya. Noong nakaraang buwan ay muli siyang nagdesisyong tumakbo bilang konsehal. 

Bumuhos ang pakikiramay ng mga kaibigan at kasamahan sa industriya sa pagyao ni Rico. Kabilang na rito sina Lea Salonga, Gary Valenciano, Martin Nievera, Sharon Cuneta, Ogie Alcasid, Janno Gibbs, Jessa Zaragoza, Jhong Hilario at marami pang iba,

NORA, NA- ISNAB ULI BILANG NAT’L ARTIST
Noong Oct 24, inilabas ng Malacanang ang listahan ng mga pangalan ng mga bagong hirang na National Artists. Ito ay kinabibilangan nina  Francisco Manosa (Architecture), movie director Eric de Guia, na kilala bilang “Kidlat Tahimik” (films), Ramon Muzones at Resil Mojares (Literature), Ryan Cayabyab (Music), Amelia Lapena Bonifacio (Theater), at Lauro “Larry” Alcala (Visual Arts). Pangungunahan ni Pangulong Duterte ang paggawad ng parangal sa mga bagong National Artists.

Ang mga awardees ay tatanggap ng titulong National Artist, gintong medalya na gawa ng Bangko Sentral ng Pilipinas (BSP), citation at panghabang-buhay na benepisyo na hindi nalalayo sa tinatanggap ng mga nasa matataas na puwesto sa pamahalaan. Ang mga buhay na awardees ay tatanggap ng Php200,000 (net of taxes) na cash award, lifetime monthly allowance na hindi bababa sa Php50,000, medical at hospitalization benefits hanggang Php750,000 kada taon, life insurance policy mula sa GSIS o private insurance companies mula sa araw ng pagtanggap ng award, state funeral, place of honor sa mga state functions, national commemoration ceremonies at cultural presentations. Sa mga posthumous awardees, tatatanggap ang kanilang pamilya ng one-time cash award na hindi bababa sa Php150,000. 

Samantala, dismayadong muli ang fans ni Nora Aunor nang hindi na naman napasali ang pangalan ng mahusay na aktres sa mga napili. Ilang taon na rin naman nilang ipinaglalaban na maibigay kay Nora ang karangalang ito dahil para sa kanila, wala nang makakapantay sa husay nito sa pag-arte. Noong 2014, tinanggal din ni dating pangulong Benigno Aquino III. ang pangalan ni Nora sa listahan ng awardees dahil daw sa drug issue na kinasangkutan niya.  Ang paliwanag ni PNoy noon: “Sa aking pananaw yung national artist binibigyan natin ng honor na ito, puri, na ito ay malaki ang ambag sa lahing Pilipino at dapat tularan “.  “ Ang naging problema ko lang dun ay alam naman natin lahat…na-convict po sya sa drugs, “  ang dagdag pa niya.

Bilang reaksyon sa muling pag-iisnab sa kanya, nagpahatid ng mahabang mensahe si Nora. Ang bahagi ng kanyang mensahe:  “Muli, sa administrasyon ni Duterte nagkaroon na naman ng deliberation para sa hihiranging mga National Artist.  Automatic na ang pangalang Nora Aunor sabi ng NCCA sa listahan ng tatanghaling National Artist . Hindi na ako kasama sa deliberation dahil dapat noong panahon pa ni PNoy ay dapat daw ay ipinagkaloob na sa akin ang NA pero hindi nangyari. Dito ngayon sa administrasyon ni Duterte ay naulit uli ang pagtanggal ng pangalang Nora Aunor sa listahan ng National Artist.  Tinanong  ko na naman ang sarili ko. Ano ba ang NATIONAL ARTIST?  Ano ang criteria ng NCCA at CCP para gawing National Artist ang  isang tao? Bakit pa nila ako isinali rito kung  hindi naman ako pala ako karapat dapat?. Kailangan bang sumipsip ka sa administrasyon para ipagkaloob sa iyo kahit hindi dapat na maging sa iyo?

“Tulad ng sinabi ko dati pa ay kung maging  National Artist man ako o hindi ay tuloy  pa rin ang takbo ng BUHAY natin.  Laking pasasalamat ko sa DIYOS  na nakapagtrabaho pa rin ako ngayon at binigyan ako ng mga totoong mga tagahanga , ilang mga kaibigan na tunay na nagmamalasakit , nagtatanggol at nagmamahal ng walang katapusan. Nalungkot lang ako at sumama ang loob ko para sa mga Noranians at mga kaibigan na nagtulung-tulong, naniniwala at nakikipaglaban sa akin mula pa sa Tawag Ng Tanghalan hanggang  ngayon. Ilang years na ba? 51 years na ang nakakaraan.

“Sa mga minamahal Kong mga Noranians, mga kaibigan sa press na nagmamahal pa  rin sa akin, hayaan  na natin ang nangyari.  Kung para sa atin ipagkakaloob din iyan ng  Diyos sa tamang panahon at kung hindi para sa atin kahit anong pilit ang gawin natin Hindi NIYA ito ibibigay. Mas lalo kayong magkaisa,  magkasundo, at magmahalan. Nadudurog ang puso ko para sa inyo. Kalimutan muna po natin iyan. Magmove-on na po tayo at  magsimula  po tayo uli para sa ating magandang layunin para sa ating kapwa.  Ang ONANAY muna ang tanging maialay ko sa inyo na  huwag kalilimutang panoorin.  Iniaalay namin ito para sa inyo.  MAHAL NA MAHAL ko kayong lahat.”

REGINE, NAPIKON SA BASHERS 
Umalma na si Regine Velasquez sa mga taong patuloy na naninira sa kanya sa social media, mula nang lumipat siya sa ABS CBN pagkatapos ng dalawang dekadang pagta-trabaho sa GMA Network. Itinaon pa ang mga sunud-sunod na batikos sa kanyang unang paglabas sa Kapamilya TV shows nitong Linggo, sa ASAP at Gandang Gabi Vice (GGV), kaya halata ang pagkairita ng Asia’s Songbird nang sagutin ang mga ito.

Noong una ay malumanay pang sumagot si Regine ng “my dear, mag-ingat ka sa mga sinasabi mo”, pero patuloy pa rin daw ang pamba-bash sa kanya. “Again WORDS ARE VERY POWERFUL. hindi porket hindi ako nagsasalita eh ok lang na bastusin nyo ko. Hindi kayo ang iniwan ko! Can someone enligh­ten me about cyber crime please. I think it’s about time we put these kinds of people to jail. You think it’s only words that you don’t really hurt us well you’re wrong. #NoToCyberBullying. Dapat hindi na ito pinapalampas hindi natututo eh sobra na. Can you ima­gine if this is our kids! Oh my gosh! Kung ako ang tanda ko naaapektuhan pano pa yung mga bata. Please someone help me with this. Just want to make this clear hindi ako pumapatol, I want to teach these people a lesson. #NoToCyberBullying,” ang sunod-sunod na tweets ni Regine. Pahabol niya pa: “Now guys bullying the bully is NOT the solution. But I am going to do something about this. So help me GOD.”

Sunud-sunod naman na nagbigay suporta ang malalapit sa kanya, tulad nina Ogie Alcasid, Zsazsa Padilla, Daryl Ong, Angeline Quinto, Erik Santos, Jed Madela, Yeng Constantino at Angelu de Leon.

Marami sa mga fans ng Kapuso network ang aminadong sumama ang loob kay Regine nang nagdesisyon itong maging Kapamilya, dahil isa si Regine sa pinakamahusay na talent ng GMA. Alam nilang lalong lalakas ang mga programang sasalihan nito at matatalo sa ratings ang mga katapat na programa ng GMA. Noong Linggo, nag-trending ang unang pagsabak niya sa ASAP, na taped mula sa kanilang naging show sa Australia. Kinagabihan ay pinag-usapan din ang paggi-guest niya sa Gandang Gabi Vice (GGV).

Pero, taliwas sa inaasahan, naglabas ng datos nitong Lunes ang AGB Nielsen na nagsasaad na tinalo sa ratings ng Sunday Pinasaya at Kapuso Mo, Jessica Soho (KMJS) ang mga programang nilabasan ni Regine sa ABS CBN.

Naglabas din ng mensahe si Regine: “Dear bashers, congratulations to everyone in SPS & KMJS and I’m happy that you guys are happy. But just a suggestion, total, sinasabi nyong lahat na hindi ako kailangan ng GMA, sinabihan nyo nga ako na wala akong utang na loob, wala akong loyalty (apparently, 20 years cannot be considered being loyal), na mukha akong pera. Maybe you guys can stop insulting me, my husband and my son. Lumipat lang po ako ng network, hindi ako pumatay ng tao. Again, I’m grateful for my 20 years in GMA. I made a lot of friends there and I have great memories of being a Kapuso. Tutal naman po, nayurakan nyo nang bonggang bongga ang pagkatao ko na para bang may nagawa akong masama sa inyo personally.You guys obviously hate me, gets ko na po. Gets ko rin na hindi nyo papanoorin ang mga shows na gagawin ko sa ABS, tanggap ko na po yon at wala naman pong pilitan ito. Free TV po ito, walang bayad, we are all here to provide you entertainment for free!!, So sa madaling salita, kayo ang panalo dito. Nagmamahal, Kapamilya Regine.”

Sa ngayon ay pinaghahandaan din ni Regine ang concert niyang “Regine at The Movies” na gaganapin sa Nov 17, 24 at 25 sa New Frontier Theater (dating Kia Theater). Siya rin ang kakanta ng theme song ( komposisyon ni Ogie) ng bagong TV series ni Angel Locsin na “The General’s Daughter” na malapit nang ipalabas.

Ang una niyang TV project maliban sa ASAP, ay ang bagong edition ng “Philippine Idol”, kung saan isa siya sa tatayong judges. 

DEREK, MAGIGING KAPUSO NA 
Inamin ni Derek Ramsay na nakikipag-usap sila sa ilang top executives ng GMA Network sa posibleng paglipat niya dito. May mga inalok na raw na mga projects sa kanya, kasama na ang TV series na pagtatambalan nila ni Jennylyn Mercado. Gusto raw ni Derek ang nasabing project dahil dalawang beses na rin naman niyang naging leading lady si Jen sa pelikula, na maganda naman ang mga naging resulta. Pero nakikiusap daw siya na kung sakaling matuloy ito, sana raw ay sa susunod na taon na ito simulan.

Si John Estrada na matalik na kaibigan ni Derek ang isa raw sa humikayat sa kanya na lumipat na rin sa GMA7, kaya malaki ang tsansa na maging Kapuso na rin siya.
Si Derek ay dating Kapamilya actor bago lumipat sa TV5, at nakasama rin niya dito sina Aga Muhlach, Ogie Alcasid, Sharon Cuneta, Janno Gibbs at Willie Revillame, na isa-isa na ring nag-alisan.   

POKWANG, EDDIE GARCIA, PANALO SA QCINEMA FILMFEST
Tinanghal na best picture ang pelikulang “Oda sa Wala”, sa ginanap na 2018 QCINEMA International Film Festival (QCIFF).  Bukod dito, nanalo ring best director si Dwein Baltazar at best actress si Pokwang (gamit ang tunay na pangalan na Marietta Subong) para sa nasabing pelikula.

Si Eddie Garcia ay tinanghal na best actor para sa pelikulang “Hintayan sa Langit”, na nakakuha ng Audience Choice award.

Best supporting actor si Marcus Adoro ( Dog Days) at best supporting actress si Cielo Aquino ( Billie and Emma). 

Ang QCIFF ang nag-iisang international film festival na ginaganap sa Pilipinas. Ang QCIFF 2018 ay bahagi rin ng selebrasyon ng 100 years ng Philippine Cinema, at ipinalabas ang mga pelikulang kasali noong October 24- 30, 2018.

Don't Miss