Responsive Ad Slot

Maid FinderFind employer quickly!
Download the App!
Latest

Buhay Pinay

Features

People

Sports

Philippine News

Join us at Facebook!

Kulay Pasko ang Sweet Gum Woods sa Tai Tong

15 December 2018

Ang kakaibang tanawin sa Tai Tong

Ni Marites Palma

Kung inaakala ninyo na ang mga puno na nagpapalit ng dahon mula luntian, dilaw, hanggang pula ay makikita lang sa mga bansa na nakakaranas ng matinding taglamig o snow katulad ng Canada, Japan o Amerika, nagkakamali kayo.

Dito sa Hong Kong ay may isang lugar din na kakikitaan ng ganitong klase ng puno, ang sweet gum, Habang ang mga nakapaligid na punongkahoy ay nanatiling kulay luntian ang mga dahon, kapansin-pansin ang matingkad na kulay  ng mga puno na ito.

Parang “magic”, sabi nga ng mga nakakita na nito.

Sa bansang Japan at Canada, nakagawian na ng mga turista na dayuhin ang mga lugar kung saan makikita ang ganitong kakaibang tanawin kapag papalapit na ang winter, o dili kaya ay patapos na.

Sa Hong Kong, bibihira pa ang nakakaalam na may ganitong mala-engkantong lugar kung saan maaaring magkuhanan ng litrato na siguradong hahangaan ng mga makakakita. Disyembre ang pinakamagandang panahon para bumisita dito.
Disyembre ang pinakamagandang panahon para bumisita sa Sweet Gum Woods
Hindi na kailangang lumayo pa para marating ang lugar na ito na tinaguriang Sweet Gum Woods, na nasa Tai Tong sa distrito ng Yuen Long.

Sumakay lamang ng West Rail Line patungong Long Ping Station, at lumabas sa exit B2. Hanapin ang himpilan ng Bus K66, na siyang dapat mong sakyan para marating ang Tai Tong Shan Road (sabihin sa driver na dito kayo bababa para makasiguro, pero ito ang pangalawa sa panghuling babaan). Pagdating sa Tai Tong Shan Road, maglakad pataas ng mga isa hanggang isa’t kalahating oras, at mararating na ang Sweet Gum Woods.
Dilaw at pula ang mga dahon ng punong sweet gum
Sa kasalukuyang panahon na nagkukulay pula ang mga dahon ng punong ito, ang bus K66 ay may biyaheng diretso mula sa Long Ping MTR hanggang Tai Tong Shan Road tuwing Linggo at araw ng piyesta opisyal. Mas malapit din ng may kalahating kilometro ang lugar na bababaan.



Tumatakbo ang bus na ito tuwing ika-15 minuto mula 10:30 ng umaga hanggang ika-4 ng hapon papuntang  Tai Tong, at ang pabalik naman sa Long Ping station ay mag-uumpisa mula ala una hanggang ika-pito ng hapon.

Kung marami kayong magkakasama, mas maigi na sumakay na lang ng green taxi mula sa Yuen Long MTR diretso sa Tai Lam Country Park kung saan nagkukumpulan ang mga puno ng sweet gum. Aabot ng mga $60 ang biyahe, na tatagal ng ilang minuto lang.



Dahil ang Hong Kong ay kabilang sa mga lugar na sub-tropical ang klima, karamihan ng mga puno dito ay naglalagas lang ang dahon bago mag winter, nguni’t hindi nagpapalit ang kulay. Bukod tanging ang puno ng sweet gum lang na madalas na ihalintulad sa maple tree ng Canada ang nagkukulay ng matingkad na pula bago tuluyang nalalagas ang mga dahon.



Ang mga dahon ng puno ng sweet gum  ay nagsisimulang magbago sa buwan ng Nobyembre at nalalagas sa Enero, pero sa Disyembre, mula sa kalagitnaan hanggang sa katapusan, makikita na mapulang mapula na ang mga dahon nito.

Bakit nagbabago ang mga kulay nito?



Ayon sa paliwanag ng mga siyentipiko, ang mga dahon kasi nito ay naglalaman ng ibat ibang klase ng pigment o kulay: ang chlorophyll na nagbibigay ng kulay na luntian, ang  carotenoids para sa dilaw na kulay, at anthocyanin para sa pulang kulay. Sa pagbabago ng klima ang mga dahon ay natutuyo at nalalamigan kaya namamatay ang chlorophyll at naiiwan ang kulay na dilaw at pula ng mga ito.




Sa mga nagnanais na makakita ng kakaibang tanawin sa Hong Kong sa buwan ng Kapaskuhan, magpunta na sa Sweet Gum Woods, at siguradong kakainggatan ng inyong mga kaibigan at kaanak ang mga litrato ninyo na kuha dito.















Don't Miss