Limang buwan pa lang si Marissa sa Hong Kong at nagtatrabaho sa mag-asawang Taiwanese na may dalawang anak, at may kasamang lola sa bahay, nang tanggalin siya sa trabaho.
Sa umpisa pa lang ay ipinahiwatig na ng amo na may mga hindi dapat gawin si Marissa, kabilang na ang huwag umutang, at magsanla ng pasaporte. Hiningi pa ng amo ang kanyang pasaporte para itanim sa isip niya na hinding hindi niya ito dapat isanla.
Nang makaapat na buwan siya sa amo ay hiniling ni Marissa na bawiin ang pasaporte dahil gusto daw niyang dalawin ang pinsan na nasa Macau. Ngunit dahil nasabi na niya sa amo na ilegal ang pananatili doon ng kanyang pinsan ay hindi siya pinayagang umalis.
Nang sumapit ang Linggo ay muli niyang sinabi sa amo na gusto niyang pumunta sa Macau, at pinayagan naman siya, pero mahigpit na pinagbilinan na bumalik din kinagabihan dahil aalis ito papuntang Taiwan kinabukasan.
Akala niya ay ayos lang sa amo dahil hindi ito sumagot. Dumating ng Hong Kong si Marissa alas 11 ng umaga ng Lunes, at dumating sa bahay ng amo ng alas 12:30. Dinatnan niya doon ang mag-asawa at pati lola. Walang sinayang na oras ang amo. Binigyan agad ng termination letter si Marissa, kasama ang sahod, travel allowance at ticket pauwi sa Pilipinas.
Walang ibinigay ng isang buwang sahod kapalit ng abiso dahil ayon sa amo ay ito ang nagpabaya sa trabaho. Sinabi pa ng amo na kung magrereklamo si Marissa sa Labor Department ay handa siyang harapin ito.
Panay ang hingi ng paumanhin ni Marissa sa amo ngunit hindi ito natinag. Kahit umiyak pa siya sa harap nito at kusang ibinigay ang pasaporte ay hindi nagbago ng desisyon ang amo. Idiniin nito na sinabihan na siya na kailangang bumalik siya ng Linggo ng gabi dahil papunta ito ng Taiwan ngunit hindi siya sumunod.
Sising sisi si Marissa dahil mababait ang mga amo, at medyo maluwag pa ang kanyang trabaho dahil katuwang niya ang lola sa gawaing bahay. May sarili siyang kuwarto at binigyan pa ng koneksyon sa wifi. Ang mas masaklap, hindi pa siya bayad sa mga inutang niya sa Pilipinas para makapagtrabaho sa abroad, at may apat siyang anak na umaasa sa kanya. Ni hindi din siya makalapit sa pinsang pinagpilitang dalawin sa Macau dahil TNT lang ito doon.
Si Marissa ay 39 taong gulang, tubong Albay at dating nagtatrabaho sa Tai Wai. – Rodelia Villar
---
TANGKILIKIN ANG ATING MGA SPONSOR:
