Pinay na nag-overstay nang 2 taon, 7 linggong makukulong

 

Ikinulong pa rin ng mahistrado ang Pilipina kahit nagsabi itong payag na siyang umuwi

Isang 40-anyos na Pilipinang dating domestic helper ang ipinakulong kahapon, Mayo 8, ng isang mahistrado sa Shatin Law Courts matapos umamin sa sakdal na ilegal na pamamalagi sa Hong Kong nang dalawang taon matapos mapaso ang kanyang visitor visa noong 2015.

Humarap si Maricar Sotingco, isang single mother, kay Magistrate  Cheng Lim-chi  upang umamin sa sakdal na pananatili sa Hong Kong nang labag sa batas pagkaraan ng Agosto 13, 2015.

Ayon sa tagausig, dumating sa Hong Kong si Sotingco noong Setyembre 20, 2013 upang mamasukan bilang kasambahay ngunit naputol ang kanyang dalawang-taong kontrata bago ito matapos at hindi siya umuwi sa Pilipinas bago lumipas ang kanyang dalawang linggong palugit upang manatili at maghanap ng bagong amo.

Pagkaraan ng halos dalawang taong pag-overstay ay nagpasiya si Sotingco na sumuko sa Hong Kong Immigration Department at naghain ng “non refoulement application” para hindi mapauwi nang sapilitan.

Nabanggit ng tagausig na si Sotingco, isang high school graduate, ay may anak na babae na ngayon ay 18 taong gulang na at lumaki sa piling ng kanyang ina. Sinabi ring habang nasa Hong Kong ay nagkaroon ng anak na lalaki ang nasasakdal na ngayon ay 7 taong gulang na.

Ayon naman sa kanyang tagapagtanggol, nagpasiya si Sotingco noong Setyembre 8, 2021 na umuwi na lamang silang mag-ina sa Pilipinas upang makapiling nila ang kanyang panganay na anak at ang kanyang ina.

Sinabi rin ng abogado na sa pananatili ni Sotingco sa Hong Kong ay hindi siya nagtrabaho nang labag sa batas at napanatili niyang malinis ang kanyang record.

Bilang parusa ay pinatawan ng mahistrado si Sotingco ng walong linggo sa kulungan, pero sinuspindi ang pitong araw sa sentensya, kaya 7 linggo na lang ang kanyang ilalagi sa preso.

Habang siya ay nasa piitan, ang kanyang anak ay inilagay sa pangangalaga ng Hong Kong Social Welfare Department.