Responsive Ad Slot

Maid FinderFind employer quickly!
Download the App!
Latest

Buhay Pinay

Features

People

Sports

Philippine News

Join us at Facebook!

Congen Tejada, ayaw na umuwi ang mga OFW na luhaan dahil sa utang

23 November 2019

Ni George Manalansan
Image may contain: 1 person, smiling, standing
Ayaw ni Congen Raly na umuwing luhaan ang mga OFW

Hangad daw ni Consul General Raly Tejada na mabawasan ang bilang ng mga Pilipinong luhaan na araw-araw na pumupunta sa Konsulado dahil sa utang at iba pang problema sa pera.

Sinabi ito ni Congen Tejada nang magsalita siya bilang tampok na panauhin sa pagtatapos ng may 200 migranteng manggagawa na lumahok sa mga libreng pagsasanay sa tamang paggastos at pagnenegosyo na hatid ng Card Hong Kong Foundation.

Isinagawa ang pagtatapos sa conference room ng Philippine Overseas Labor Office sa YF Life Tower sa Wanchai noong ika-17 ng Nobyembre.
Binanggit ni Congen Tejada ang isang pag-aaral na isinagawa ng Bangko Sentral na nagpapakita na 70% ng mga migranteng Pilipinong manggagawa ay nagdurusa dahil sa kakulangan ng kaalaman sa paghawak ng pera.

Kadalasan, nagpaplano diumano ang mga Pilipino na magtrabaho sa ibang bansa ng mula tatlo hanggang limang taon lamang, nguni’t marami ang hindi nakakauwi hanggang umabot na sila ng hanggang 20  o 30 taon sa ibayong dagat.

Kabilang sa mga mithiin niya, ani Congen Tejada, ay ang makauwi ang mga OFW na may ipon at kakayanang magsimula ng negosyo dahil sa kaalamang natamo mula sa mga grupong katulad ng Card. Umaasa daw siya na ang mga nagtapos sa araw na iyon ay hindi mabibilang sa mga umuuwing luhaan.



Payo niya, “Gamitin ang natutunan sa Card.”

Sa umpisa ng kanyang mensahe, sinabi ni Congen Tejada na nananatiling ligtas ang mga Pilipino sa Hong Kong kaya walang katotohanan ang pilit na ipinapakalat na balita ng ilan na magsisimula na ang paglilikas o evacuation mula dito dahil nag martial law na.

“Fake news” daw ang mga ito at hindi dapat ikalat. Para makasiguro, subaybayan lang daw ang mga opisyal na pahayag o anunsyo ng gobyerno sa Facebook page ng Konsulado o website ng Department of Foreign Affairs.

Natutuwa naman daw siya na matatalino ang mga Pilipino at marunong umiwas sa gulo kaya walang naiipit sa sagupaan ng mga nagpo protesta at pulis.

Sa unang bahagi ng pagtitipon naman ay si Acting Labor Attache Antonio Villafuerte ang naging tampok na panauhin.
 
Si ALA Tony (nakasalamin, gitna) kasama ang mga nagtapos at lider ng Card
Pinatawa ni ALA Villafuerte ang mga nagtapos sa kanyang mga pagbibiro, katulad ng pagsasabi na ang ibig daw sabihin ng PhD minsan ay “Puro Hangin Daw”, at yung MNSA ay “may ninong sa administrasyon.”

Pero seryoso ang naging payo niya sa mga nagtapos na ipagpatuloy ang kanilang pag-aaral tungo sa tunay na tagumpay.

Aniya, "It is not just something you do to advance in life - because you will not going very far in life based on what you already know - but you are going to advance in life by what you are going to learn.”

Sinabi naman ni Alex Aquino, chairman ng Card HK Foundation, na tatlo ang kanilang isinasawang pagsasanay para sa mga OFW: ang financial literacy, skills training at entrepreneurship seminar, kasama ang business planning.

Simula sa Enero ng darating na taon, uumpisahan na daw ang pagtuturo ng paggawa ng kakanin para pangkabuhayan.
Image may contain: 10 people, including Leo A. Deocadiz
Ang panunumpa ng mga nagsanay ay kabilang sa programa ng pagtatapos
Sa kasalukuyan, umaabot na sa 3,121 ang bilang ng mga nakapagtapos sa pagsasanay ng Card HK, at 2,287 nang mga ka-pamilya nila ang nabisita ng Card sa Pilipinas. Mahigit kalahati sa mga ito, o 1,655, ang nakikinabang na sa mga produkto at serbisyo ng Card MRI, ang punong organisasyon ng Card HK.

Isinalaysay naman ni Jireh Duhina, isang manager sa Card MRI, na sinimulan ni Dr. Aristotle Alip ang kumpanya noong Disyembre 1986 sa halagang beinte pesos lang, at gamit ang isang lumang makinilya. Ginamit daw niya ang mga ito para humanap ng kasangga sa misyon niyang putulin ang kahirapan sa Pilipinas.

Sa nagdaang 33 taon ay umusbong nang husto ang Card MRI at sa ngayon ay may 22 institusyon na gaya ng bangko, kumpanya ng seguro, pautangan, at paaralan para sa mga gustong mag negosyo.

Kabilang din sa programa ang mga nagbigay-patotoo mula sa hanay ng mga nagtapos ng kung paano sila natulungan ng kanilang natutunan mula sa Card HK.

Mayroon sa kanila na dating baon sa utang, mayroon namang bumagsak ang negosyo, at may isa na bulagsak sa pera. Dahil sa mga natutunan nila mula sa Card HK, mas  naging malinaw na raw ang kanilang patutunguhan sa buhay.

Para sa karagdagang impormasyon tungkol sa mga libreng pagsasanay ng Card, mangyari lang na hanapin ang kanilang Facebook page, "CARD Hong Kong Foundation" at magpadala ng mensahe doon.
---
I-try mo ito, Kabayan: Kung interesado kang ma-contact ang mga advertiser namin dito, pindutin lang ang kanilang ad, at lalabas ang auto-dialer. Pindutin ulit upang tumawag. Hindi na kailangang pindutin ang mga numero.

Call now!
CALL US!


Don't Miss