The SUN HK : Pinoy, biglang inamin na sinaktan ang asawa

15 March 2023

Itinakda ang pag-sentensiya sa Pilipino sa April 4

Biglang natapos ang paglilitis ng isang Pilipino sa Eastern Court kanina nang umamin siya sa kasong pananakit ng kanyang asawa.

Bago rito, itinigil nang halos isang oras ang paglilitis laban kay Lito Felnar Novo, 48 taong gulang, upang hintayin ang testigo laban sa kanya, na nagpasabing papunta na sa korte pero naipit ang sinasakyang taxi sa traffic sa North Point.

PINDUTIN PARA SA DETALYE!

Nauwi sa paglilitis ang kaso dahil itinanggi ni Novo ang paratang noong una.

Sinabi ng taga-usig kay Deputy Magistrate Leona Chan na handa na siyang iprisinta ang kaisa-isang testigo upang patunayan ang pagkakasala ni Novo, na nagtatrabaho sa isang restaurant bilang supervisor.

Pero nang dumating ang testigo, na siya palang biktima sa kaso at asawa ni Novo, pinaghintay lang ito sa labas ng korte at hindi na pinapasok dahil hindi na kailangan ang kanyang testimonya.

PINDUTIN PARA SA DETALYE

Nagmula ang kaso sa insidente kung saan sinabunutan ni Novo ang asawa noong Dec. 5, 2020 sa kanilang bahay sa Leighton St. sa Causeway Bay.

Ayon sa paratang sa kanya, umuwing lasing si Novo at hindi agad mabuksan ang pintuan kaya kumatok.

Nang mapagbuksan siya ng asawa, sinabunutan niya ito dahil sa tagal nang pinaghintay niya sa labas.

BOOK YOUR FLIGHTS NOW! PRESS FOR DETAILS

Nagpunta sa Ruttonjee Hospital ang babae na nagrereklamo na masakit ang anit. Itinawag sa pulis ang kaso matapos niyang ilahad ang nangyari.

Inamin ng abugado ni Novo na ikalawang beses na itong kinasuhan ng pananakit sa asawa.

Ang naunang kaso ay natapos sa bind-over, kung saan nangako si Novo na hindi na gagawa ng kasalanan sa loob ng dalawang taon, kapalit ng $2,000 na babayaran niya sa asawa kung siya ay lumabag sa pangako.

Pindutin para sa detalye!

Dahil sa paglabag na ito, ang pinagsamang parusa ng dalawang kaso ay dapat nang pagsilbihan ni Novo.

Ayon sa Offenses Against the Person Ordinance, ang parusa sa kaso niyang common assault o pananakit ay pagkakakulong ng hanggang isang taon.

Hiniling ng abogado ni Novo na bigyan siya ng kahit anong parusa huwag lang ang pagkakakulong, dahil may sinusuportahan pa siyang magulang at anak sa Pilipinas.

Itinakda ni Magistrate Chan sa Apr. 4 ang pag-sentensiya kay Novo.

Inutos rin niya na gawan ito ng report ng probationary officer at Community Service Office, na gagawing basehan sa pagpaparusa.

Nakalalaya siya sa bisa ng piyansang $1,000.