Natuwa pa si Joy noong mabalitaang may
kalaguyo ang asawa na kapitbahay din nila sa Pilipinas, dahil mayroon na siyang
mabigat na rason para makipaghiwalay. Wala na kasing hanapbuhay ang kanyang
asawa ay nambabae pa. Maraming taon siyang nagtiis dahil wala naman siyang
mabigat na dahilan para dispatsahin na lang basta ang batugang asawa. Pero
dahil sa ginawa nitong pambabae ay alam ni Joy na hindi na siya masisisi kung
iwanan na niya ang lalaki. Sa isang banda ay masama din ang loob ni Joy sa
pagkawasak ng binuo nilang pamilya pero mas makakabuti na daw ang nangyari
dahil mas panatag na ang loob niya ngayon. Isa na lang kasi ang aalalalahanin niya, at ito ay ang mabigyan ng magandang
edukasyon ang mga anak. Ayaw niyang magaya ang mga ito sa kanya na hindi
nakatapos sa kolehiyo dahil nag-asawa agad. Wala siyang tanging hiling ngayon
kundi magabayan sila ng Panginoon para maging mabuting mag-aaral ang mga anak,
at siya naman ay patuloy na maging malusog para patuloy na makapagtrabaho
hanggang kinakailangan. Sa Hong Kong ay nililibang niya ang sarili sa pagsali
sa grupo ng mga sumasayaw. Kahit paano kasi ay nawawala lahat ang kanyang
hinanakit sa buhay tuwing sila ay sumasayaw na. Mababait naman ang mga amo niya
sa kanya at hindi mabigat ang kanyang trabaho. Wala ring problema pagdating sa
pagkain. Kung minsan ay parang naniniwala na tuloy siya na kung mabait ang mga
amo ay problema naman ang dulot ng asawang iniwan sa Pilipinas. Si Joy ay 38
taong gulang na tubong Quirino province, at kasalukuyang naninilbihan sa mga
among Intsik sa Tsing Yi. – Marites Palma