Nakatuwaan niyang tumambay sa grupo na nagbibigay ng libreng masahe at blood pressure check-up. Tuwang tuwa ang mga miyembro nito kay Cezar dahil magiliw at masaya itong kausap kaya kahit unang pagkikita pa lang nila ay magaan na ang loob ng mga ito sa kanya.
Nakipagkilala si Cezar sa bawat isa at tinawag na kaibigan ang lahat sa grupo, bago humingi ng permiso para doon magpalipas ng buong araw. Masayang nagkwentuhan ang lahat, at ipinaliwanag ng grupo ang takbo ng buhay ng mga OFW sa Hong Kong, lalo kapag araw ng pahinga.
Napabilib ng grupo si Cezar sa kanilang ipinakitang pagkakawanggawa at malasakit sa kapwa, kaya nasabi nitong masaya pala sa Hong Kong dahil nagtutulungan ang mga Pinoy. Paliwanag naman ng lider ng grupo, mas mabuti na ang tumulong sa kapwa kesa sa tumambay ng maghapon. Isang paraan din iyon para hindi mangulila sa pamilya na nasa Pilipinas, at para hindi mapabarkada sa mga taong mapagsamantala at walang ginagawang makabuluhan sa buhay.
Hindi pinalampas ni Cezar ang pagkakataon na i-add ang mga bagong kaibigan sa Facebook para daw kahit wala na siya sa Hong Kong ay tuloy-tuloy pa rin ang kanilang balitaan. Inimbitahan naman si Cezar ng lider ng grupo na makipagkita muli sa kanila sakaling bumalik sa Hong Kong.
Hindi nakalimutan ng lahat ang mag-selfie bago sila tuluyang naghiwalay-hiwalay. Nagpasalamat si Cezar sa grupo dahil sa kanilang naging masayang kuwentuhan sa maghapon. Si Cezar ay tubong Daet, Camarines Norte, at nagtatrabaho sa isang pribadong kumpanya sa Pilipinas. – Ellen Asis