 |
| Matagal naghintay ang mga kaibigan at ka-probisya ni Asuncion P. Salubre sa intensive care unit ng ospital, |
Ni Merly P. Bunda
Itinakbo si Asuncion P. Salubre sa ospital noong gabi ng Marso 8 matapos matagpuan ng among babae na nakahandusay sa loob ng kanyang kuwarto at walang malay.
Agad siyang inoperahan sa Queen Mary Hospital sa Pokfulam pero habang sinusulat ang balitang ito ay hindi pa rin siya nagkakamalay.
Si Salubre, 60 taong gulang at dalaga, ay halos 22 taon nang naninilbihan sa kanyang amo na taga South Horizons sa Aplei Chau.
Ayon sa amo, nagtaka siya ng walang nagbukas ng pintuan sa kanya nang siya ay mag doorbell. Pagpasok niya ay agad niyang nakita ang kasambahay na walang malay, kaya dali-dali siyang tumawag ng ambulansiya para maitakbo ito sa ospital.
Agad namang nagdesisyon ang mga doktor na operahan ang Pilipina dahil kritikal na daw ang kundisyon nito. Malaki daw kasi ang namuong dugo sa kanyang utak sanhi ng pagputok ng isang ugat doon (o aneurysm).
Isang kababayan na sumama sa amo ni Salubre sa pagdala sa kanya sa ospital ang nagsabi na inumpisahan ang operasyong bandang alas 10 ng gabi, at tumagal ito ng mahigit tatlong oras.
Kinabukasan ay ipinaalam din ng amo sa OWWA (Overseas Workers Welfare Administration) ang nangyari kay Salubre para mabisita nila at maipagbigay alam din sa kanyang pamilya ang tungkol dito.
Ayon sa limang kababayan ni Salubre na bumisita sa kanya noong Marso 10, parang naririnig ng pasyente ang pagtawag nila sa kanyang pangalan dahil ginagalaw nito ang kanyang mga mata. Kahit hindi makadilat ay nakikita daw nila na nangingilid ang luha sa mga mata nito.
Ayon sa amo ng Pilipina, gusto daw nito na gumaling talaga ang kasambahay bago umuwi sa kanilang bahay sa barangay Anuang,Cabatuan ,Iloilo.
Nanghihingi naman ng panalangin ang kanyang mga kaibigan, kababayan at kaanak para sa kanyang mabilis na paggaling .
===
BAGO ITO!
Mas madali nang tawagan ang mga advertiser natin dito. Pindutin lang ang kanilang ad at lalabas ang automatic dialer. Isa pang pindot ay matatawagan mo ang advertiser na hindi na kailangang i-dial ang numero nila. I-try mo!
jargonhr@yahoo.com
