Responsive Ad Slot

Latest

Sponsored

Features

Buhay Pinay

People

Sports

Philippine News

Join us at Facebook!

Usaping utangan, mas pinalawak pa ng Card HK

24 October 2019

Ni George Manalansan
Image may contain: 13 people, people sitting
Tinuruan ang mga nagsanay na mag-impok para makaiwas sa utang

Nagkaroon ng mas malalim na pagtatalakay tungkol sa problema sa utangan ng mga migranteng manggagawa sa isinagawang financial literarcy workshop ng Card Hong Kong Foundation noong ika-20 ng Oktubre sa Philippine Overseas Labor Office sa Wanchai.

Ito ay matapos lumabas na sa 73 na dumalo sa pagsasanay, 28 lang o halos ikatlong bahagi ang may ipon. Ang ilan ay napagkakasya lang ang kinikita pero mayroon din na nababaon sa patong- patong na pagkakautang sa iba't ibang kadahilanan.

Batay sa kuwento ng mga kalahok ang madalas na ugat ng pagkakautang ay ang biglaang pangangailangan ng pamilya, pagiging iresponsable ng kabiyak na naiwan sa Pilipinas, pagpatol sa mga scam sa kagustuhang kumita ng malaki, pagtitiwala sa bagong kakilala, at marami pang iba.
Ayon kay Cecil Eduarte na trainor sa paksang “debt management,” hindi layon ng talakayan na husgahan ang mga nagkakautang kundi para magtulungan ang lahat sa paghanap ng solusyon sa problemang dulot ng pangungutang.

Tinalakay niya ang iba-ibang klase ng utang (para mapakita ang pagkakaiba ng “good debt” sa “bad debt”), paano i-compute ang interest o tubo sa utang, at kung sino lang sa mga miyembro ng pamilya ang dapat suportahan o sustentuhan.

Kasama sa mga nagsanay si Noemi C., 62, taga Quezon City at dumating sa Hong Kong noong 1996. Inilahad niya kung paano siya nabaon sa utang noon. Taong 1998 nang matangay ng isang illegal recruiter ang Php100,000 na ibinayad niya para makapagtrabaho sa Hong Kong ang kanyang asawa. Noong panahong iyon ay may pinapaaral siya sa high school at kolehiyo, at may isang anak na epileptic na binibilhan niya ng gamot. Ilang beses niyang na “re-loan” ang $40,000 niyang utang kaya inabot ng 2003 ang kanyang pagbabayad.


Call us!

Sa ngayon ay nakaahon na raw siya, ayon kay Noemi. Mayroon na siyang ipon, may pension pa.
Ang una niyang payo sa mga kapwa manggagawa ay ang maging responsible sa pagbabayad ng utang. Sa edad niya ay maari na siyang bumalik sa Pilipinas pero mabait daw ang kanyang amo kaya nanatili pa siya dito.

Si Catherine A. naman na taga Pasay City ay naloko daw ng isang “kaibigan” na nakilala lang niya sa Hong Kong. Hiniraman siya ng perang pampuhunan at pinangakuan na hahatian sa kita mula sa pagbebenta ng mga bag, sapatos at damit sa online, pero hindi siya binayaran at pati ang kanyang kapital ay tinangay. Sa kaka renew niya ng kanyang loan ay umabot ng apat na taon ang kanyang pagbabayad. Ngunit dahil sa mga natutunan niya sa mula sa Card ay mag-iingat na daw siya at hindi basta-basta magtitiwala lalo na pagdating sap era.

Katakot-takot na pahirap naman ang sinapit ni Airilyn R. ng Bicol, na apat na taon na sa Hong Kong. Wala daw siya talagang ipon dahil tatlo ang anak niyang sinusuportahan, at nalulong pa sa droga ang kanyang asawa.

“Sa una pa lang ay naloko na ako ng nagpasok sa akin sa trabaho. Ginamit niya pangalan ko sa pag lo loan tapos hindi ako binayaran,” ayon sa kanyang salaysay.

Bukod sa anak na patuloy niyang sinusuportahan, nag problema din si Ailyn kamakailan dahil biglang nagpakamatay ang kanyang kapatid, at siya ang gumastos sa pagpapalibing. Ang kanyang payo sa mga kapwa migrante, “huwag gumastos basta-basta para hindi mabaon sa utang”

Image may contain: 2 people, including Edna LolaAktibista Aquino
Card HK founder tells participants to use what they learned to get out of debts

Natuwa naman ang founder ng Card HK na si Edna Aquino sa positibong pagtanggap ng mga dumalo sa pagsasanay. Nangako siya na papataasin pa ang kalidad ng workshop para mas maging kapaki-pakinabang ito sa mga migranteng manggagawa.

Pinayuhan ni Aquino ang mga nabaon sa utang na gamitin ang mga natutunan sa workshop upang bumangon unti-unti.

Ang katatapos na pagsasanay ay siyang pinakahuli ng Card HK para sa taong 2019. Para sa mga workshop sa darating na taon, iminumungkahi sa mga interesado ang mag “like” sa Facebook page ng Card Hong Kong Foundation at abangan ang mga anunsiyo tungkol dito.


---
I-try mo ito, Kabayan: Kung interesado kang ma-contact ang mga advertiser namin dito, pindutin lang ang kanilang ad, at lalabas ang auto-dialer. Pindutin ulit upang tumawag. Hindi na kailangang pindutin ang mga numero.

Call us!
Don't Miss