Responsive Ad Slot

Latest

Buhay Pinay

Features

People

Sports

Philippine News

Join us at Facebook!

Mag-ingat sa online loan

17 May 2020

Ni Rodelia P. Villar


Laging gipit si Marnel M dahil sa sakiting anak, kaya halos hindi magkasya ang suweldo mula sa mga among taga Tsuen Wan na tatlong taon na niyang pinagsisilbihan.

Si Marnel na 35 taong gulang ay single mother ng dalawang anak na inaalagaan ng kanyang ina sa Batangas, kaya sa suweldo lang niya umaasa ang lahat.

Lalong lumaki ang gastos niya nang mag lockdown dahil kailangan puntahan ng doktor ang kanyang anak sa bahay para gamutin. Mahal din ang gamot na nirereseta sa bata. Kahit may nakukuha siyang discount sa PhilHealth ay malaki pa rin ang gastos niya.  


Pindutin pra sa detalye!

Dahil dito ay naengganyo siya na mag-apply ng utang sa isang online lending company na nakita niya sa internet. Ang balak niya ay mangutang lang ng $5,000 at nang sabihin sa kanya na 5% ang interest buwan-buwan ay nakumbinsi siya. Sa ibang tao kasi ay 10% ang hinihinging patong buwan-buwan.

Ang hindi niya inaasahan ay may sinisingil pa la na $1,500 na “processing fee” ang pautangan, at kailangan niya itong bayaran bago mailipat sa account niya ang pera. Dahil desperado ay pikit-matang nag top-up siya sa account na binigay sa kanya. Pagkalipat niya ng pera ay agad siyang na block sa page ng pautangan.

Ganoon na lang ang paghihinagpis ni Marnel dahil niloko siya sa panahon na kailangang kailangan pa naman niya ng pera. Wala siyang utang sa kahit anong financing company  pero hindi niya alam kung bakit sa araw na iyon ay bigla siyang nagka-interes na mangutang.


Call us!

Umiiyak na naikuwento ni Marnel ang nangyari sa amo. Natatawa at naiinis din siya sa sarili na dahil hindi niya maipaliwanag kung bakit mabilis siyang naniwala at nagpadala ng pera. Sinabihan lang siya ng amo na mag- ingat sa sunod.

Ganoon na lang ang gulat niya nang sa araw ng sahod niya kamakailan ay binigyan siya ng amo na ekstrang $2,000 para sa kanyang anak. Nahihiya man ay buong lugod na tinanggap ni Marnel ang pera mula sa among mabait.

Nakakahiya man at nakakalungkot ang nangyari sa kanya ay minabuti pa rin ni Marnel na ibahagi ito sa isang grupo ng mga kapwa OFW para magsilbing babala sa iba. Paalala niya na mag-ingat sa pakikipag transaksiyon sa online at huwag basta magtitiwala.
Mabuti na lang, aniya, kahit minalas siya at naloko ay masuwerte pa rin siya dahil may amo siyang mabait na nagsalba sa kanya. 

Paano ba malalaman kung ang isang online na pautangan ay legal at hindi isang scam? 
Narito ang ilang palatandaan, ayon sa mga eksperto:  (1)   Hindi interesado ang nagpapautang na tingnan ang kakayanan mong magbayad; (2) Walang opisina ang nagpapautang; (3)  Pilit kang ineengganyo na magdesisyon agad; (4)  Aprubado agad ang iyong loan application; (5)  Sinisingil ka agad para sa “processing” gayong wala ka pang natatanggap na pera

   
Don't Miss