 |
| Isa sa mga inarestong nagtatrabaho ng ilegal |
Apat na pinaghihinalaang employer at limang
nagtatrabaho ng ilegal ang hinuli sa mga raid na isinagawa ng Immigration Department sa 63 na lugar sa nagdaang apat na araw.
Ayon sa report ng Immigration, ang mga nahuling
nagpapatrabaho ay pawang mga babae, edad 41 hanggang 55.
Ang mga nahuling trabahador naman ay edad 35 hanggang 52. Tatlo
sa kanila ay lalaki at dalawa ay babae.
Dalawa sa mga lalaki at isa sa babae ay nagtataglay ng
recognizance form, na nagbibigay pahintulot sa kanilang manirahan sa Hong Kong
habang pinag-aaralan ang kanilang hiling na huwag pauuwiin sa kanilang bansa nang
sapilitan - pero pinagbabawalan silang magtrabaho.
Nakuhanan din sila ng pekeng HK ID card, na pinarurusahan ng
batas ng multang aabot sa $100,000 at pagkakakulong ng 10 taon.
Naganap ang panghuhuli nang ilunsad ng Immigration ang
operasyong tinawag nilang "Lightshadow"
at "Twilight" noong June 20-23.
Pinasok nila ang 63 na establisimento sa iba-ibang distrito ng Hong Kong na binubuo ng mga kainan,
commercial building, factory, isang industrial building, logistics center, ipinapaayos
na lugar, residential building, restaurant at tindahan.
Kasunod nito, inulit ng Immigration ang paalala sa mga
employer na huwag umupa ng mga taong hindi pinapayagan na magtrabaho sa Hong Kong. Mahigpit daw kasing ipinatutupad ang polisiyang ito.
Ipinaalala rin sa kanila ang parusa sa mga nagkasala -- multang
itinaas sa $500,000 mula sa $350,000 at pagkakakulong ng hanggang 10 taon.
Sa isang pahayag, sinabi rin ng Immigration ang parusa sa
mga ilegal na nagtatrabaho: multa na hanggang $50,000 at pagkakakulong ng
hanggang dalawang taon.
Kasama sa mga bawal magtrabaho sa Hong Kong ay ang mga illegal
immigrant o pumasok sa Hong Kong nang walang pahintulot, mga turista, overstayer o may deportation order.
