The SUN HK : Mag gantsilyo at malibang!

Ni Cris Cayat

Umabot ng 3 oras ang pagsasanay dahil ayaw bitawan ng mga kasali ang kanilang ginantsilyo

Sinamantala ng 21 kababaihang migrante ang pagkakataon na dumalo sa “Crochet Workshop” na isinagawa ng grupong Guhit Kulay sa Bayanihan Center sa Kennedy Town noong Jan. 15.

Pinangunahan ni Ellen Almacin, isang miyembro ng Guhit Kulay, ang pagtuturo ng paggantsilyo.

Bagamat nauuso muli ngayon ang gantsilyo ay nag-alala pa rin si Ellen kung may interesado ba sa isasagawa niyang pagsasanay dahil hindi glamorosa ang ganitong gawain at tila mga may edad lang ang interesado na gawin ito bilang pampalipas-oras.

PINDUTIN PARA SA DETALYE

Pero laking gulat ni Ellen at iba pa niyang kasamahan sa Guhit Kulay dahil marami ang dumating kaya ang dating dalawang oras na itinalaga sa pagsasanay ay naging tatlong oras dahil ayaw bitawan ng mga dumalo ang kanilang ginagantsilyo.

May mga ibang gigil na gigil matuto ngunit dahil noong high school pa sila huling humawak ng gantsilyo ay nahirapan silang kontrolin ang kanilang mga kamay. Pero mayroon din namang sanay na gaya ni Luz Penaranda, na nakakagawa na ng takip ng kama, at buong lugod na ibinahagi ang kanyang nalalaman sa iba pa niyang kasamahan.

Lahat ng dumalo ay umuwi na may dalang hikaw na sila mismo ang gumawa. Katulad nito ang mga ginagawa ngayon ni Ellen na lubos na hinahangaan ng mga sumusubaybay sa kanya sa Facebook.

PINDUTIN PARA SA DETALYE

Ayon kay Ellen, nagsimula siyang maggantsilyo bago pa siya naging miyembro sa Guhit Kulay. Nauna siyang nahilig gumawa ng iba-ibang accessories katulad ng hikaw, bag at iba pa, gamit ang mga pull tabs sa mga de latang softdrinks.

Kalaunan ay dinagdagan niya ng mga ginantsilyong parte ang kanyang mga produkto para lalo silang maging mas kaaya-aya.

Magandang libangan at tulong sa problema ang pag gantsilyo, sabi ni Ellen

Ayon kay Ellen, napagtanto niya na kahit tali sa trabaho ang isang domestic worker ay may oras pa rin silang dapat ilaan sa sining, kaya gumawa siya ng paraan upang matuto ng ibang mapaglilibangan.

Naging malaking tulong sa kanya ang mga nakikita nyang gawa ng mga taga Guhit Kulay at ang mga napapanood nya sa YouTube.

BOOK YOUR FLIGHTS NOW! PRESS FOR DETAILS

Ayon kay Ellen, nais niyang ipagpatuloy na mapalago ang kanyang paggawa ng iba-ibang produkto gamit ang mga natural o recycled na materyales. Sa paraang ito ay makakatulong siya na mabawasan ang basura sa paligid.

Ang paggagantsilyo at paglikha ng mga bagong gamit ay naging kanlungan daw niya sa mga problema.

“Nakatulong ito sa akin lalo na noong naghahanap ako ng ginhawa dahil sa pagpanaw ng aking ama,” sabi niya.