The SUN HK : Tulfo: Buwagin ang online paluwagan at iba pang scam na OFW ang puntirya

Milyon daw ang natangay ng nagtatag ng paluwagang ito sa HK

Nanawagan si Senador Raffy Tulfo sa iba't iba't ibang sangay ng gobyerno na paigtingin ang kampanya laban sa mga scammer sa internet na ang mga overseas Filipino workers (OFW) ang tina target, partikular na ang online paluwagan.

Sa isang pagpupulong sa Senado na pinangunahan ng Committee on Migrant Workers na pinamumunuan ni Tulfo, hinimok ng senador ang Department of Migrant Workers, Overseas Workers Welfare Administration, Department of Information and Communications Technology, Manila International Airport Authority at National Bureau of Investigation na magsagawa ng plano para matigil ang mga online scammer na ito.

Ito ay matapos ilahad ng isang OFW at IT expert na si Romel Malapira ang pagkalat ng mga sinasabing “online paluwagan” na ibinebenta sa mga OFW bilang isang paraan ng pagnenegosyo.

PINDUTIN PARA SA DETALYE

“Kapag hindi nakabayad ang isang member, lahat ng kasali ay hindi nakakasweldo. At kahit magbayad din, wala pa din ibibigay na pera, kadalasan kasi mga kamag-anak, kaibigan din ang nagre-recruit,” sabi ni Malapira.

Ang online paluwagan ay katulad din ng regular na paluwagan, kung saan ang mga miyembro ay naghuhulog ng pera buwan-buwan para makaipon ng malaking halaga na siyang pinapasweldo sa miyembrong nakatoka sa bawat buwan.

Nagkaka problema lang madalas sa ganitong usapan dahil yung mga nauna nang nakasweldo ay tumitigil na sa pagbabayad, o bigla na lang nawawala.

PINDUTIN PARA SA DETALYE

Ganito ang nangyari kamakailan sa Hong Kong, kung saan ang itinurong pasimuno ng isang paluwagan ay bigla na lang daw hindi nagparamdam matapos diumanong makuha ang milyon-milyong halaga ng hulog o investment ng mga kapwa OFW na nakumbinsi niyang sumali.

Si Mera Jane Vicio (o MJ) na taga Kidapawan City ay inireklamo sa Konsulado nitong nakalipas na Abril ng isang grupo ng mga kapwa niya OFW dahil sa hindi pagpapsweldo sa kanila pagkatapos nilang makapaghulog ng malaki sa kanyang paluwagan.

Itinakda daw kasi ni Vicio ang sarili na syang kukubra ng pasweldo na P100,000 sa unang dalawang buwan, pero nang dapat nang makakubra ng kita ang pangwalo at panghuling miyembro ng grupo ay hindi na ito nagpakita.

Pindutin dito

Ang mas masaklap, nakumbinsi niya ang ilan ang sa mga nakakubra na ng sweldo mula sa paluwagan na ibalik nila ito para pang-invest sa mga negosyong itinayo niya, at saka biglang naglaho.

Kalaunan, may ilang mga OFW ang nagreklamo din, dahil ang mga dating “runners” daw ni Vicio ay ginaya ang kanyang estilo at nagawa ding itakbo ang malaking halaga mula sa mga sumali sa kanilang sariling paluwagan.

Nagpanukala si Tulfo na bigyan ng libreng financial literacy training ang mga OFW

Para matigil ang ganitong panloloko, minungkahi ni Tulfo na magsagawa ng malawakang pagsasanay at pagpapakalat ng balita ang mga ahensyang kanyang binanggit, lalo na sa social media.

Kung maari, magpunta din daw sila sa mga probinsiya para balaan ang mga tao doon tungkol sa mga online scam, at paano nila maiiwasang mabiktima.

Nauna rito, nagpasa ng panukala si Tulfo na layong mabigyan ang mga OFW ng libreng financial literacy training o pagsasanay para sa mas maayos na pangangalaga sa kanilang kinita, at nang makaiwas sila sa scam.

Ang pagsasanay ay ibibigay bago sila umalis ng bansa (pre-departure) o pagdating nila sa bansang kanilang pagtatrabahuan (post-arrival).

Kasabay nito ay nanawagan din si Tulfo sa mga ahensya ng gobyerno na pigilan ang mga taxi na pumapasok sa airport sa paniningil nang sobra sa mga OFW, at buwagin ang mga VIP lounges sa paliparan at gawin silang “Balikbayan Hubs” para mga bagong bayani ng bansa.